Todos os 12 de agosto a Unión do Povo Galego (UPG) conmemora o cabodano do asasinato do seu militante Xosé Ramón Reboiras Noia, por disparos da policía franquista no número 27 do portal situado na rúa da Terra, en Ferrol. A tal efecto organizase a mediodia unha concentración no cemitério da parroquia de Imo, no Concello de Dodro, para depositar flores ao pé da sua tumba e a media tarde unha concentración política en Ferrol, xusto enfrente do portal onde fora asasinado.

A UPG quer colaborar activamente en que non se dilua a memória histórica de loita contra a ditadura fascista. Consideramos que non debe pasar desapercibido o traballo de moitos galegos e galegas que, mesmo a custa de pór en perigo a sua vida, loitaron para acadar unha sociedade democrática, demandando o recoñecimento pleno de todos os direitos e liberdades tanto para as persoas como para as nacións que forman parte do Estado español, nomeadamente a nosa, Galiza, onde o direito de autodeterminación se torna indispensábel.

Ofrecemosvos aquí as intervencións políticas dos actos celebrados en Ferrol nos últimos anos e que constituen a única ocasión onde a UPG se proxecta publicamente, explicitando a nosa posición política sobre o contexto que se vive nesa altura.