|
|
|
 35 anos da UPG ao servizo da Terra
Qué é a UPG?Precisamente, o texto que ven de seguido apareceu publicado na portada do Terra e Tempo número 45 de Abril de 1977 no início dunha etapa de grande vitalidade para o -nesa altura- voceiro da UPG. Reproducimos este documento ao ser a expresión da condensación do pensamento da UPG como partido ao longo da década dos 70, tras un periodo de elaboración teórica e contrastación prática que conduce a este Partido cara un alto grau de madurez política. 1.- Galiza como nación colonizada Galiza é unha nación oprimida económica, política e culturalmente pola burguesia monopolista do Estado español. Galiza é unha nación colonizada porque para que poda desaparecer aquela opresión é necesário destruir o Estado colonialista e rematar coa función que cumpren as clases populares galegas dentro do Estado español: É por iso que, na Galiza, loita de liberación nacional e loita de clasese son indisolúbeis ou o que é o mesmo; a loita nacional na Galiza posui un claro conteúdo de clase. Xa que logo, a loita polo socialismo, obxectivo estratéxico da UPG pasa inevitabelmente pola independéncia nacional, pola construción dunha pátria galega ceive e popular, soberana e solidária con todos os povos do mundo. 2.- Necesidade dun partido operário marxista-leninista nas nacións colonizadas. A UPG como produto de tal necesidade Contra capitalismo imperialista que aferrolla a nosa Terra, só cabe unha resposta; a organización política da vanguarda do proletariado nun partido operário. Ese partido é a UPG: a sua ideoloxia a da clase obreira: o marxismo-leninismo. Só a clase obreira, polo seu papel no proceso de produción, pola sua coesión, discipliña e capacidade organizativa, en suma, porque é a negación mesma do sistema burgués, está en condición de loitar consecuentemente até o final contra capitalismo e colonialismo na nosa nación. No noso Partido existe unha maioria absoluta de obreiros e empregados, e un número sempre crescente de labregos, mariñeiros e patriotas, de ideoloxia comunista procedentes dos sectores máis empobrecidos da pequena burguesia. Como partido revolucionário, a UPG ten unha estrutura organizativa concorde cos seus obxectivos. Rexe-se polo princípio do centralismo democrático; praticado consecuentemente é o único capaz de aliar o princípio da democracia interna sempre en función duns intereses irrenunciábeis e coerentes de conxuntar a disciplina coa camaraderia, o espirito crítico e autocrítico coa consciéncia da realidade. 3.- A UPG e a necesidade de auto-organización das clases traballadoras galegas A auto-organización política e sindical do proletariado galego e das clases traballadoras en xeral, é a única garantia de que o proceso de autodeterminación do noso povo será tal e respostará aos intereses das clases populares. Somente un partido que manteña na prática unha independéncia ideolóxica, política e organizativa respeito ás organizacións políticas de ámbito estatal pode defender incondicionalmente, sen servidumes nen enfeudamentos, os intereses do proletariado e de todo o povo galego. Ese partido é a UPG, o único partido realmente patriótico que existe na Galiza. Defender os partidos de ámbito estatal en nome da unidade da clase obreira e da necesidade de loitar unidos contra un inimigo comun é esquecer todo o anteriormente mencionado, pero ademais é esquecer que unidade significa pacto entre iguais e loita contra o inimigo desde a problemática específica de cada quen. Por todo esto é polo que a UPG é un partido nacional galego, porque xurdiu como necesidade organizativa do proletariado galego que padece duas mostras ben visíbeis do feito colonial: sobreexploración e emigración. O noso nacionalismo non separa, une o povo galego en función da sua liberación; a nosa loita pola revolución nacional-popular galega é a mellor proba de solidariedade real que podemos oferecer ao proletariado e aos povos do Estado español, da Europa e do mundo. Nisto consiste o internacionalismo proletário nunha nación colonizada como a nosa. No momento presente cremos que é especialmente importante fortalecer a liña de masas organizativa e ideolóxico-política, xa que a loita política pasa a primeiro plano nunha situación de democracia burguesa e que, por conseguinte, só a confrontación ideolóxica e política poden facer avanzar a loita nacional-popular. En nome deste princípio, a UPG apoia a auto-organización da clase operária e demais clases populares galegas en organizacións de masas cunha perspectiva anticapitalista e anticolonial. Sen a nosa presenza e pulo, hoxe non serian realidade a ING, CCLL, CCMM, ERGA, o FC, múltiplas asociacións de viciños e de bairros. 4.- A UPG e o obxectivo da revolución nacional-popular na Galiza Como partido operário que é, a UPG loita polo socialismo, pola supresión da propriedade privada dos meios de produción, contra da exploración do home polo home no camiño da sociedade comunista. Agora ben, o proletariado non é a única clase explotada senón que o capitalismo colonial padecen-o tamén todas as clases populares galegas, o que determina unha converxéncia obxectiva de intereses na loita pola liberación nacional e social do noso povo. Por iso a revolución nacional-popular é un paso necesário no camiño do socialismo na Galiza e precisa, para ser realidade, da formación dunha ampla frente interclasista integrada por todas aquelas clases que asumen a contradición principal presente hoxe na Galiza: a que opón as camadas populares galegas á burguesia monopolista do Estado español. As clases populares galegas necesitan soberania política para acometer a reforma agrária e pesqueira, para facer unha industrialización racional do país, para investir na Galiza os aforros dos nosos emigrantes, para rematar dunha vez por todas coa emigración, para converter o galego na única língua oficial da Galiza, para construir unha democracia sen monopólios. Só un Estado galego democrático-popular será capaz de levar adiante estas medidas, imprescindíbeis para encetar a reconstrución material e cultural do país, e mellorar substancialmente as condicións de vida do noso povo. Por todo o anterior a UPG, na fase actual, preconiza a loita pola liberación nacional e social da Galiza, como paso necesário para a construción do socialismo, e fai seu, como programa mínimo, o contido das Bases Constitucionais e o programa de desenvolvimento económico, cultural e social da AN-PG. A AN-PG representa, como organización política apartidária e patriótica, con vocación de poder popular, da que forma parte a própria UPG, a frente interclasista necesária nun país colonizado neste momento histórico. Agora ben, o Partido non pode diluir-se na frente. Só a existéncia dun partido operário independente é garantia de que a clase operária galega hexemonizará a revolución nacional-popular e procurará a sua transformación en revolución socialista. O proletariado galego debe constituir-se en clase nacional para dirixir estratexicamente a revolución galega. 5.- A UPG como único partido comunista patriótico (nacional) A UPG é o único partido galego que defende na prática os intereses do proletariado e de todo o povo galego. É o único partido que ten elaborada unha alternativa revolucionária para a clase operária. É o único partido que loita pola oficialización do galego e pola normalización da nosa cultura. É o único partido que loita pola dignificación da vida política do noso país. Temo-lo demostrado cos noso mortos, cos noso prisioneiros, con centos de militantes torturados, multados e procesados. Temo-lo demostrado coa nosa participación na vanguarda da loita anticapitalista e anticolonial: desde Castrelos até as Encrobas; desde o Dia da Pátria Galega á recente folga da construción de Lugo. O bloque nacional-popular (AN-PG/UPG) está espallado por toda a Galiza. Nengunha outra corrente política chega hoxe até o último curruncho da nosa Terra; nengunha ten uns obxectivos tan precisos que rematarán coa explotación do noso povo. |
A
UPG